हेलिकप्टर उडानको अनुमति ढिलाईले बिरामीको मृत्यु

गोरखाखबर(गोरखा,६ साउन )। हेलिकप्टर बाट उद्दार गर्न कागजी प्रक्रिया मिलाउँदैमा ढिलो भए पछि गोरखाको दुर्गम चुमनुब्री गाउँपालिकामा समयमा उपचार नपाएर शुक्रवार एक बिरामीको मृत्यु भएको छ । बिहीवार साँझ देखि मुटु दुःखेर बिरामी परेको चुमनुब्री वडा नं ६ चुम्चेतकी २१ वर्षीया मिङ्गमा चेम्जोङ्गको मृत्यु भएको धावा ग्याल्जेनले जानकारी दिए । प्रशासनको सिफारिस लिएर मन्त्रालयको कागज मिलाउँदैमा समय बितेको र सिम्रिक एयर को हेलिकप्टर काठमाण्डौं उड्न लाग्दा बिरामीको मृत्यु भएको खबर पाएको ग्याल्जेनले बताए । निषेधित क्षेत्रका रुपमा रहेको चुमनुब्री गाउँपालिकामा हेलिकप्टर उडान गर्न जिल्ला प्रशासन कार्यालयको सिफारिसमा गृह र उड्यान मन्त्रालयको अनुमति चाहिन्छ ।